الاردنيون يصفون حياتهم قبل الانترنت .. صورة

رؤيا - حاتم الشولي - نشرت صفحة رؤيا الرئيسية على الفيسبوك الاربعاء صورة تبين حال الاسرة قبل وجود الانترنت، وعرضت الصفحة سؤالا لمتابعيها حول شكل حياتهم قبل وجود الانترنت، وتنوعت الاجابات وكان العديد منها مفعم بالتفاصيل.

عمر عابد علق على الصورة وقال "اليوم جارك الي ساكن انت وياه في نفس العماره ما بتعرف اسمه على الرغم انه النبي صلى الله عليه وسلم أوصى على سابع جار بدك تسلم على صاحبك او اخوك او معرفة الك بتقول خليني افتح على الفيس بوك او تويتر يمكن انو متاح عشان اسلم عليه بدل ما تروح له اما قبل كانت الناس قلوبها على بعض اقلها كانت فلسطين معنا"

يزيد الثوابي كتب على الصورة فكرة جديدة طبقتها عائلته للحفاظ على الترابط الاسري بعيدا عن عالم التكنولوجيا فكتب "أحنا بعيلتنا أقترحنا فكرة أنه الكل قبل ما يدخل عالغرفة الي فيها تعليلة يغلق تلفونه ويعطي لحد، ونجيب الشدة والاجواء العائلية تبلش وكل أشي قديم نعمله . بس المشكلة بتفكير الانسان نفسه"

احمد ابو حامد استذكر ايام الزمن الجميل، والتفاصيل العالقة في ذكرياته فعلق على الصورة وقال "الله يرحم ايام زمان وسدر العدس مع الزيتون والفجل والليمون يكون مجتمعين كل العائلة حواليه وسهرات لعبة الشده ومنقل الفحم وصوبة البواري يا ريت ترجع بس مستحيل تحياتي".

حنين ابراهيم ترى ان الحياة قبل الانترنت  كانت اجمل فكتبت " الحياة قبل الانترنت كانت احلى وابسط من هيك .. الفرحه كانت اكبر وملل اقل .. والقعده مع الاهل بتجنن ..اما حاليا ملل وقرف وشو ما نعمل مش عاجبنا حتى السفر صار ملل .. للاسف جواب ليش مش عندي"

وبحسب آخر الأرقام الرسمية الصادرة عن دائرة الإحصاءات العامة، دخلت الهواتف الذكية بيوت 70 % من الأسر الأردنية، كما أن الانترنت بمختلف تقنياتها تتواجد اليوم في 69 % من بيوت الأردنيين، فيما تنتشر تقنية الهاتف الخلوي في معظم منازل الأردنيين.