التوجيهي لمرة واحدة اعتباراً من العام المقبل .. ردود فعل متباينة
رؤيا - عبير أبو طوق - تباينت ردود الفعل عبر مواقع الاواصل الاجتماعي فور صدور قرار مجلس التربية والتعليم الأربعاء، عقد امتحان شهادة الدراسة الثانوية العامة مرة واحدة في نهاية كل عام دراسي ابتداء من العام الدراسي المقبل 2017/2016.
الطالب الجامعي أنس الفاعوري بين أن هناك ايجابية واحدة فقط لهذا القرار "الايجابية الوحيدة لهالموضوع انه ما بعيشوا لحظة التنبؤ بـ متى النتائج الا مرة وحدة بس".
شيرين فريحات بينت أنه يجب تطوير اداء المعلمين وصقل مهاراتهم "قبل ما تعملوا التوجيهي فصل واحد وتطلعوها على جناب الطلاب روحوا شوفوا المعلمين بالمدارس شو مستوى عطائهم، التوجيهي بعتمد على المراكز والدروس الخصوصي والوزارة مبسوطة انه نسب بعض المدارس مرتفعة وبتعتقد انه انجاز لمدارسها، قبل ما تعاقبوا الطلاب حسنوا نوعية التعليم".
عرين أبو شحادة كتبت "إن شاء الله ما تضيع منا أحلامنا ونكون قدهااا يااااارب، كل واحد ونصيبو!".
بدوره أكد أحمد ياغي على ضرورة تطوير مهارات المعلمين لأن لها دور واضح في تأسيس الطلبة، لقوله "المفروض قبل ما ينفذ قرار متلك هيك، يعمل على تبديل كل كوادر التعليم الحالية إلي من ألصف الأول للسادس ويجيب احسن ناس يدرسوهم، لإنو إذا إتأسس الطالب ببطل في حاجة للمدرس".
عائشة أبو علان تساءلت عن خطط التطوير في الوزارة "العالم يتقدم لا يرجع الى الوراء يا وزارة التربية؟ هذا كان زمان اما هلا كل الدول المتقدمة وغير المتقدمة الامتحانات بفصلين، ولكن للعدالة في الموضوع يجب ان يتم تقديم نفس المواد لكل الطلاب بنفس الفصل، يعني الكل يقدم كيمياء في الفصل الاول وفيزيا في الفصل الثاني؛ حتى يكون تنافس الطلاب على حق بمستوى الاسئلة والعلامات ومن ثم القبول الجامعي
التطوير والتخطيط الاستراتيجي يا وزارة التربية!".
ميساء عريقات كتبت تعليق عن المناهج في فلسطين "احنا في فلسطين بنقدم مره وحده وعنا بنجيب معدل عالي اكترها "99 وعنا دمار وعنا شهداء وقصف وحالتنا حاله وبنجيب معدل عالي الحمد لله وحتي حذف ما بيحذفو اشي من الكتب الا القليل وتعالو شوفو المنهاج شو صعب عنا".
فداء مساعدة اعتبرت أن القرار غير مدروس "الله يعين الطلاب كل سنة قرار شكل رح تضيعو الأجيال بقراتكم الكتيرة والغير مدروسة".
لمى هلسه تحدثت عن تجربتها في سنوات سابقة بتقديم الامتحان لمرة واحدة "زمان قدمنا فصل واحد وماشي الحال توكلو على الله ربنا ما بنسى حدا ...الله يوفقكم والوزاره تتغير ويروح النسور والذنيبات مره واحده".
نداء عطوط طلبت من وزير التربية والتعليم الاهتمام أكثر بالصفوف التي تسبق التوجيهي "حسبي الله ونعم الوكيل ليش ما يضل فصلين هو الوزير مو شايف الا التوجيهي يروح يشوف باقي الصفوف احسن لانو مش معقول اصعب توجيهي في الاردن".
تامر حماد بين أن الفرصة ضاعت في مثل هذا القرار على الطلبة الذين كانوا سيتقدمون للتوجيهي مرة أخرى للحصول على علامة أعلى، لقوله "يعني عشان نويت اعيد التوجيهي واصير بني ادم اكيد مابدهم نصير متل البشر انا داري والله شكلنا عمرنا ما رح ننجح بالتوجيهي خلص راحت علي".
رهف أنور تساءلت عن الهدف من اتخاذ هكذا قرار "نفسي افهم شو الهدف من الموضوع يعني هوه شو ماثر عليه ازا قدمنا توجيهي فصلين يعني فوق ما الطلاب اساسا خايفين من ابتوجيهي هسا بقطعلنا الامل ننجح حسبي الله ونعم الوكيل".
هناء لحام كتبت "مستقبل أولادنا يجب أن يكون في أيدي أمينة ووجب علينا أن نحمي الجيل من الإحباط والفشل الذي سيؤدي إلى انهيار مجتمعنا ويقودنا إلى الهاوية".
بسمة تلجي كتبت "حرام عليكم تظلموا الطلاب فصل والله يعطيهم العافيه بدكم اياهم ينحتو طول السنه ويتوقف نجاحهم على يوم والله ظلم".
